Khotbah Prophétik


Mungguh adegé khotbah prophétik kuwi kepriyé? Jer khotbah prophétik mono satemené ora populér. Amarga wis kadhung dadi kalumrahan nampa "warisan" kang minggiraké swara awatak prophétik ing gréja. Mula pancén rada riskan lan angél kanggo nggladhi khotbah kang prophétik.

Wis dadi jamak lumrahé menawa pasamuwan mung nggatèkaké bab-bab kang gegayutan karo pastoral. Khotbah prophétik dadi barang langka. Durung manéh yén dadi pasamuwan wis kadhung jirih nggetih. Wedi karo konflik, wedi yén nuwuhaké perpecahan. Wedi ora disenengi liyan, mengko ditolak, durung manéh yén kudu 'mbayar rega kang larang' kanggo mapanaké khotbah prophétik.

Pancén nora gampang kanggo maujudaké khotbah kang prophétik. Ing tengahing rasa ngolang-aling, prayoga menawa dayaning khotbah prophétik ora disélaki. Lah kanggo negesi manéh dayaning khotbah propétik, aku ngandelaké pangandikané Uskup Agung El-Savador, Oscar Roméro:
"Sebuah Gereja yang tidak memprovokasi suatu krisis, sebuah Injil yang tidak meresahkan, sebuah Firman Tuhan yang tidak menantang hati nurani siapa pun, Injil macam apakah itu? Pewarta yang menghindari isu-isu sensitif agar ia selalu aman, dia tidak menerangi dunia."

Éman, mimbar gréja kaé, kang dadi papaning khotbah kang ngraga, luwih kepéngin dadi papaning komédian lan dhagelan golék panggung. Sengaja digawé mangkono supaya hana kawigatén mirunggan kanggo ngrembakaning téologi njembling. Sawijining téologi kang mesthiné butuh pangati-ati supaya khotbah prophétik nemokaké papané kang samesthiné. Ora malah sakabéhé, olah kridhaning pasamuwan dikuwasani déning téologi njembling.

Lha njuk kepriyé menawa téologi njembling malah diuja déning para juru khotbah kang pinter golèk panggung kaé? Prayoga menawa kanthi anteping ati tetep lumaku mecaki tepining 'Bengawan Piedra'. Hana wektu mirunggan ing tepining bengawan iku kanggo timpuh sawetara. Sabanjuré, kanthi swara luruh bisaa pratéla: 'San Roméro, nyuwun sembahyanganipun kanggé kawula.'


Komentar