Modhal Dhengkul


Dhengkul kuwi, yén wis pinesthi dadi modal, sanyatané pancén gedhé paédahé. Apa manéh menawa kuwi dhengkulé priyayi pinunjul kaya Amien Rais. Sawijining tokoh reformasi kang kondhang marga nazaré kepèngin mlaku saka Ngayogyakarta tumeka Jakarta menawa Joko Widodo menang Pilihan Presiden 2014.

Priyayi sepuh kanthi gelar profesor kuwi tambah kondhang, amarga nazaré durung dileksanani tumekané dina saiki. Luwih manéh, bangkotané Partai Amanat Nasional kuwi malah durung suwé iki njeksani Presiden Jokowi dadi tukang ngibul. Lumrah waé yén Menteri Luhut Binsar Panjaitan dadi duka yayah sinipi, jaja bang kepanggang mawa.

Mosok, Presiden kang lagi nengenaké ngedum sertifikat lemah diarani tukang ngibul. Kan yo Beelzebul tenan yén kaya mangkono patrapé. Padhakné wong gembul cabul waé sing pancené tukang ngibul. Arep bali mulih waé nganti ora sida. Lha piyé manéh, wong gembul kaé pancén wangun yén dadi tukang ngibul. Lha wong senengané apus-apus, kok. Simboké bengak-bengok akon makani wedhus aé ora diglapé. Sakno tenan lho Cak... Wedhusé néng kandhang cedhak wit gedhang kaé nganti mbak-mbek ra karuan.

Wis ah! Mbalèni rembug bab Pak Amien Rais waé. Mbok menawa amarga profesor tuwa kuwi lagi sayah penggalihé, kepéngin mbalèkaké kasektèné dhengkulé, mula nganti ngarani Presiden Jokowi tukang ngibul. Maklum, nalika wiwitaning réformasi, dhengkulé mantan Ketua Umum Muhammadiyah kuwi pancén kondhang kadigdayané. Gus Dur waé ora bisa sélak. Mula naté mbabar pangandikan mangkéné:

"Saya ini heran, sekarang kok orang pada modal besar untuk jadi Presiden. Dulu saya cuma modal dengkul, itu pun dengkulnya Amien Rais."

Ampuh tenan to dhengkulé Amien Rais?


Komentar