Kamprét Tenan, Cak!



Majalah TÉMPO iki karepé kepriyé yo? Kamprét tenan, Cak! Rangga cah bagusé kaya Radén Janaka yo sang Indratanaya lha kok digawé kartun ora nggenah kaya ngono. Mosok carané manganggo si Rangga sing kondang gawul lan nggantheng digambar dadiné kaya kiyèk. Jia kakakak...! Gombrang-gambréng, glombrah-glambrèh, gondhal-gandhul...‎!

Untung, para penggemaré Rangga ora démo marani TÉMPO. Cetha yén Front Pembela Rangga dan Cinta (FPRC) luwih déwasa tinimbang Friend Penggemar Ihik-ihik (FPI). Lha piyé, ana gambar kartun waé yén penggemar ihik-ihik wis padha mbingungi. Kaya wong gemblung ora nganggo sarung sing gampang mutung kaya cah luntang-lantung merga wedi penthung.

Salut marang penggemaré Rangga kang tetep jejeg ngamalké agama kang kebak welas asih, sugih pangapura, dhemen tetulung, anteng lan jatmika. Sanajan kartuné TÉMPO pancén kamprét tenan, nanging ora ditanggapi kanthi nesu-nesu kaya asu sing tansah kesusu. Ora kakéhan bengak-bengok kaya wong pekok lagi mojok, kathoké mlotrok. 

Penggemaré Rangga katon luwih paham mungguh dhodhok sèlèhé karya jurnalistik. Yén karya jurnalistik mangkono mujudake wohing kamardikan ngudhar gagasan kanthi manéka cakrik kang apik kepara unik, kanthi hanané pernak-pernik kang bisa njalari pating cekikak-cekikik. 

Lha ora cekikikan kepriyé, nalika Rangga nganggo klambi gamis, katon klimis pratéla: "Maaf.... saya tidak jadi PULANG..." Lha kepriyé si Rangga iki. Jaré tresna lha kok ora mulih. 

Untung si Cinta tetep konsistèn. Ora pangling yén kuwi Bebeib Rangga kang dianti-anti, mula sawuse sarapan Pizza Hut, banjur bisa wangsulan mangkéné: "Yang kamu lakukan itu, JAHAT!"

Kamprét-kamprét...!




Komentar