Cilèkèk


Cilèkèk tenan Cah... Éntuk buka saka mahaguru arsitek Duta Wacana lha kok kahanané mrihatinké. Jan-jané nalika nampa isih plastikan, lha kok nalika dibukak wis rojah-rajèh digaglak tumo buku. Jian, cilèkèk!

Kamangka manut judhulé apik. Gunung, Bencana, dan Mitos Nusantara. Bisa dibayangké manawa isiné bakal nerangaké kasugihané bumi Nuswantoro kang nduwèni gunung-gunung kang sulistya ing warna. Ora mung kasawang blegerè waé nanging uga nalika kadhudhah mungguh dongengé. 

Contoné waé bab Gunung Bromo kang duwé crita Upacara Kasadha. Durung manèh Gunung Penanggungan kang nduwèni gayutan karo babad Majapait. Iku lagi gunung-gunung ing Tanah Jawa. Kamangka sanjabané Pulo Jawa, akèh gunung kang pantes cinandra minangka kasugihané bumi Nuswantoro.

Ing bab dayaning mbledos, Gunung Sinabung ora bisa disepèlèkaké. Gunung kang mapan ing Bumi Swarnadwipa iku anggoné glègèken sregepè ora njamak. Gunung Merapi ing cedhak Boyolali waé kalah digdaya. 

Yen ngrembug jaman kepungkur, mbledosé Gunung Krakatau wis dadi crita kang njalari pisahe Pulo Jawa lan Sumatra. Kajaba Krakatau, kasektèné Gunung Tambora ing Pulo Sumbawa ora bisa disepèlèkaké. Nalika mbledhos, tlatah Eropa waé nganti digawé pagowong. 

Kahanane gunung-gunung ing bumi Nuswantoro sangsaya nengsemake, nalika gelem ngungak mitologiné. Contoné waé Gunung Agung ing Pulo Dewata. Gunung kang mralambangaké dadi papané Sang Hyang Siwah kang mertapa ing Kailasa. Papan mirunggan kanggo ngawasaké mobah mosiking kahanan alam donya.

Kejaba Gunung Agung, hana crita Gunung Tangkubanprau ing Tatar Pasundan. Gunung kang miturut dongèngè kadadéyan saka prau kang tinendhang Sang Kuriang duk nalika duka. Ora maido, amarga katresnané rikala semana katampik déning Dayang Sumbi.

Isih akéh crita lan ukara kang ngrembug gunung-gunung Nuswantoro. Émané buku peparingé Mahaguru Mahatmanto malah rojah-rajèh kaya mangkono. Pancèn ndadèkaké kuciwa. Nanging kepriyé manéh. Ibaraté tembang, "yén sampun mekaten, kula sambat kalih sinten?"

Muga-muga waé nalika Mahaguru Mahatmanto maos tulisan iki, hana éguh kanggo nggenti kitab iku. Sanajan judulé ora kudu persis, paling ora hana buku liya kang bisa kauncalaké manéh nganti tumeka ing lengkèhing Gunung Indrakila.

Komentar